Vg2 Anleggsgartnar- og idrettsanleggsfag


Vel du å utdanna deg som anleggsgartnar vil du få moglegheit til å flytta store delar
av skulekvardagen din ut i det fri.

 

På skulen sitt uteområde vil du læra å leggja brustein og naturstein i tillegg til planting og vedlikehald av grøntområde. Du vil og få øving i å køyra traktor på skulen sitt område og nytta ulike maskiner i undervisninga.
Du bør lika å arbeida ute med planter og stein. Det er ein fordel om du har ein viss estetisk sans. Du kan fordjupa deg i ulike fagemne som til dømes trepleie, maskinbruk, idrettsanlegg eller nyanlegg.

 

Aktivitetar gjennom skuleåret:

- praktisk arbeid med konkrete prosjekt på skulen, som å laga uteplassar, murar/trapper, plantebedd m.m.
- Øving i bruk av maskiner som traktor, gravemaskin, grasklippar og hjullastar
- Utplassering i anleggsgartnarbedrifter
- Høve til utplassering i ei bedrift i Nederland (les meir om internasjonalisering her)

 

Når du har gått eit år på anleggsgartnar, går du deretter ut i lære i to år, før du kan ta fagbrev.
Ein anleggsgartnar byggjer og vedlikeheld grøntanlegg, som til dømes parkar, friluftsområde, miljøgater, gatetun, hagar, kyrkjegardar. Faget er allsidig og har tilknytning til både gartnarfaget og bygg- og anleggsfaget.
Ein driftsoperatør i idrettsanleggsfag skal kunna forvalta, driva og vedlikehalda ulike typar idrettsanlegg, både sommar- og vinteridrettsanlegg, inne og ute. Du bør vera serviceinnstilt, teknisk interessert og lika å arbeida ute.

 

   
 

Kor kan du jobba:

Det er stor etterspurnad etter anleggsgartnarar for tida, og det vil ikkje vera vanskeleg å få seg læreplass når ein er ferdig med Vg2.
Ein anleggsgartnar kan jobba i private anleggsgartnarfirma eller i kommunale etatar (parkvesen, kyrkjegardar, teknisk etat) eller i andre offentlege / private etatar (t.d. vegvesen, sjukehus, universitet, burettslag).
Som driftsoperatør i idrettsanleggsfag kan du få arbeid i offentlege etatar som eig og driv idrettsanlegg eller hjå større private anleggseigarar eller organisasjonar.
Lærlinglønna ligg for tida på kr 139 pr time. 1. halvår får du 55% av dette, 2. halvår 55%, tredje halvår 70% og fjerde halvår 75%.

 

Ulike sertifiseringar som skulen tilbyr:

Masseforflytnigsmaskiner, autorisasjon for kjøp og bruk av plantevernmedel, truck, kompetansebevis for varme arbeid.

 

Inntakskrav:

For å gå Vg2 anleggsgartnar- og idrettsanleggsfag må du ha Vg1 naturbruk eller Vg1 bygg- og anleggsteknikk.

 

 

Vidare utdanning:

2 år som lærling i bedrift eller Vg3 påbygg til generell studiekompetanse.